CEED Македонија со отворен повик до претприемачи и топ менаџери со релевантно бизнис искуство и експертиза во одреден бизнис сегмент, што сакаат, можат и имаат желба да го споделат своето бизнис искуство и експертиза со следната генерација на претприемачи и менаџери!
CEED е единствената платформа за вмрежување и доедукација во Македонија која нуди приспособена и искрена комуникација, во затворен круг на поединци од доверба, кои ја делат истата мисија.
Од основањето во 2007 година, во Македонија работиме на доедукација и вмрежување на преку 2000 членови од над 700 компании.
CEED Македонија е дел од меѓународната мрежа на CEED претприемачки центри, оперативен во 18 држави, низ 4 континенти.
Нашето верување е дека единствено преку развој и поддршка меѓу сопствениците на бизниси можеме да ја трансформираме бизнис климата и инспирираме полово еднаква, претприемачки ориентирана младина.
Во сегментот на доедукација, преку услугата: размена на искуства ги поврзуваме учесниците со најкомпетентните претприемачи од нашата земја во улога на гости говорници на соодветната бизнис група.
Гостин говорник е претприемач или топ менаџер кој го „изодел патот“ со експертиза и практично искуство од реалниот бизнис, кој е подготвен несебично да го сподели своето знаење и научени лекции на одредена тема што е негова/нејзина експертиза.
Во оваа насока, ја прошируваме нашата база на гости говорници кои со несебично инвестирање на нивното време, експертиза и искуство ќе придонесат за доброто на следната генерација на претприемачи и менаџери во Македонија.
Профил на CEED гостин говорник:
- Активен претприемач или топ менаџер,
- Локално и/или интернационално признаен како успешен претприемач или топ менаџер, вообичаено со 10+ години бизнис искуство,
- Поседува релевантно искуство на одредена бизнис тема и може да одговори на предизвиците на учесниците,
- Може ефикасно да комуницира и е подготвен да го сподели не само сопственото позитивно, туку и негативно бизнис искуство,
- Подготвен е да инвестира дел од своето време и да пренесе конкретни професионални совети, без притоа да очекува нешто за возврат.
Искажување интерес и процес на апликација
Ако се стремите да придонесете кон мисијата и верувањето на CEED Македонија, да придонесете кон личен благороден и филантропски развој преку помагање и пренесување на знаењето и сопствените научени лекции, ве каниме да ја доставите вашата апликација за CEED гостин говорник.
Ќе ни биде чест да ве запознаеме и поканиме на иницијална заедничка средба во рамки на која заедно со нашиот тим ќе направиме идентификација на компетенциите, темите и искуството со цел да процениме каде вашето искуство би било најсоодветно.
За повеќе информации контактирај не на: [email protected]
